ஆண்கள் உடையில் கலக்கும் பிரபல மொடல் நாய்! (வீடியோ இணைப்பு)

அமெரிக்காவைச் சேர்ந்த போதி என்னும் மொடல் நாய் ஒன்று புகழ்பெற்ற ஆண் ப்ராண்ட்களின் உடைகளை அணிந்து இணையத்தை கலக்கி வருகிறது. புதிதாக சந்தைக்கு வரும் புகழ்பெற்ற ப்ராண்ட்களின் உடைகளை ஆண் மற்றும் பெண் மொடல்களை வைத்து வெளியிடுவது வழக்கம். ஆனால் அமெரிக்காவில் நாய் ஒன்று பிரபல மொடலாக வலம்வருவது பலரையும் ஆச்சர்யத்தில் ஆழ்த்தியுள்ளது. நியூயோர்க்கில் ’போதி’ என்ற ஷிபா இனு வகையைச் சேர்ந்த 5 வயது நாய் ஒன்று ஆண்களை போல உடையணியும் பிரபல மொடலாக இருக்கிறது. டேவிட் என்ற க்ராபிக்ஸ் வடிவமைப்பாளர், தனது காதலி மற்றும் புகைப்பட கலைஞரான யென்னா கிம்முடன் இணைந்து தங்கள் வளர்ப்பு நாயான போதிக்கு ஆண்கள் அணியும் உடைகளை வேடிக்கையாக அணிந்து பார்த்துள்ளனர். அப்போது ஆண்கள் உடையில் போதி அழகாகவும் கம்பீரமாகவும் காட்சியளித்துள்ளது. மேலும் போதி கமெராவிற்கு முன்னால், சொன்னபடி எல்லாம் போஸ் கொடுத்ததை பார்த்த இருவருக்கும் இதனை பெரியளவில் பிரபலமாக்கும் எண்ணம் தோன்றியுள்ளது. இதையடுத்து இந்த 5 வயது போதிக்கு ஆண்களுக்கான உடைகளில் புகழ்பெற்ற பிராண்ட்களின் ஆடைகளை அணிந்து எடுக்கப்பட்ட புகைப்படங்கள் எல்லாம் இணையத்தில் நல்ல வரவேற்பை ஏற்படுத்தியுள்ளது. தற்போது சூப்பர் மொடலாக வலம் வரும் போதி, தொப்பி, டை என விதவிதமான ஆடைகளை அணிந்து கொடுக்கும் புகைப்படங்களை பதிவேற்றும் இணையதள பக்கத்தில் சுமார் 1,40,000 பேர் அதனை பின்தொடர்கின்றனர்.